بالليبي ...قال البرفسور الداهية اللي ملعب الدنيا على صبعه أنه غفوه وحبسوه يومين في غرفة فندق إنفرادي بالمغرب .
قلنا حينها أن كل فبراير غافينها منذ هتفت لليفي وصدقت إنها ثورة مباركة . وسيكتشف كل فبرايري أنه مخدوع يوما بعد يوم حسب درجة وعيه . أو حسب درجة صدمته .
قالوا لا غير البرفسور بعيرة فوتوها عليه . وشعيب حيجيب الصيد من ذيله . والشمام حيطلع أوراق الضغط من قطر . وجعودة جايهم بالتل ومدللة مستنفرة بالامجوى وسرقيوة تتوعد بالبوتكس وكويدير يرسم في الخطة على السكاي وحفتر بيغرقها بالفارينا والجروشي عارفينه لما يندهله صدام حفتر ياعمي ودغيم يواجه بالتحدي بالتحدي راية السواد الإرهابية براية السواد البرقاوية وعريبي يتمركز وسط الرباية بشراء فيلا بمليون دينار لترهيب خصومه .
...
اليوم السويحلي رئيس مجلس الدولة وولد أخته معيتيق في مجلس الرئاسة وأخته نهاد صمام أمان الحكومة وجاره باشاغا رئيس الأمن القومي وقريبهم الكبير محافظ مصرف ليبيا ومليشياتهم لجان التأمين والحماية . وقد يخلف الغرياني الصلابي أو الجابر مفتيا للديار لتكتمل اللعبة . وكله أصلي بقرار دولي ( بختم طيور الأبابيل ) . يعني حتى الشرعية اللي في كل بيان أو منشور تستعرضوا وتستدلوا بيها خذوها منكم . وعين تضحك وعين تبكي .
طلعت الزنتان بفيل الحديقة زي ماطلعوها من طرابلس بخفي حنين
وطلع الشرق كله بتل جعودة زي ماطلعت بنغازي بمدينة منكوبة ومدمرة
وطلع الغرب بطنجرة عتيقة وقعمزوا فيها عصابات مصراتة ركبة ونص
وطلع الجنوب نسيا منسيا زي ماكان أيام الوصاية الفرنسية لفزان
وعادت بمايمسمى الحوار (السلطة والمال والشرعية ) بعد ضياعها بالصناديق للمليشيات والإخوان والقاعدة .
ويستمر الغباء ... وتلقى واحد مهلوس مازال يقولك فبراير ثورة وانسرقت وانحرفت . واللي ضاربه الحيط على جبهته يقولك توا نبوا ليبيا لافبراير لاسبتمبر .. أصحي وياسرك وهم . العودة للحق ترفع من قدرك ماتنزل منه . وكفي سذاجة وضلالة وسقوط ...
